پاکستان نے محض تین روز کے دوران کووڈ 19 ویکسینز کے 50 لاکھ سے زائد ٹیکے لگا کر تاریخ رقم کر دی ہے۔
نجی اخبار کی رپورٹ کے مطابق ملک میں یومیہ ریکارڈ تعداد میں ٹیکے لگانے سے متعلق اعلان وفاقی وزیر برائے منصوبہ بندی، ترقی اور خصوصی اقدامات اسد عمر نے سماجی رابطے کی ویب سائٹ پر کیا۔
اپنی ٹوئٹ میں انہوں نے کہا کہ مسلسل 3 روز کے دوران یومیہ ویکیسن کی ریکارڈ تعداد میں ٹیکے لگائے گئے۔
ان کا کہنا تھا کہ این سی او سی کی ڈیزائن کردہ ملک بھر میں جاری موبائل ویکسینیشن مہم پر تمام صوبوں کی مدد سے عمل درآمد کیا جارہا ہے اور یہ مہم شاندار نتائج دے رہی ہے۔
Highest daily vaccination records set 3 days in a row. Nation wide mobile vaccination campaign designed by NCOC and being implemented with help of provinces producing outstanding results. Target is to reach all citizens to allow us to finally end all covid related restrictions
— Asad Umar (@Asad_Umar) February 6, 2022
سربراہ این سی او سی اسد عمر کا مزید کہنا تھا کہ مہم کا ہدف تمام شہریوں تک رسائی حاصل کرنا ہے تاکہ ہم آخر کار کورونا وبا سے متعلقہ تمام پابندیوں کو ختم کر سکیں۔
این سی او سی کے اعداد و شمار کے مطابق ہفتہ کے روز کورونا ویکسین کی 17 لاکھ 40 ہزار 554 خوراکیں، جمعہ کے روز 17 لاکھ 34 ہزار 514 خوراکیں اور جمعرات کے روز 16 لاکھ 64 ہزار 560 افراد کو ٹیکہ لگایا گیا تھا، آج کی تاریخ تک 7 ویکسینز کی 18 کروڑ 40 لاکھ 73 ہزار 883 خوراکیں لگائی جا چکی ہیں۔
ڈان کو موصول دستاویزات میں ملک بھر میں 29 ہزار 478 اموات رپورٹ ہوچکی ہیں، مرنے والوں میں سے 61 فیصد مرد شہری تھے، وائرس کا شکار ہونے والے شہریوں کی عمر دو ماہ سے لے کر 100 سال سے زیادہ تھی جبکہ اوسط عمر 62 سال تھی۔
وائرس کا شکار ہو کر مرنے والے 78 فیصد افراد کی عمریں 50 سال سے زیادہ تھیں اور 69 فیصد افراد کو ایک سے زائد مستقل بیماری تھی، مرنے والے تقریباً 91 فیصد مریض ہسپتال میں داخل رہے اور اوسط کے لحاظ سے تقریبا 6.5 دن ہسپتال میں داخل رہے، ہسپتال میں داخل ہونے والے تقریباً 44 فیصد مریض وینٹی لیٹرز پر رہے اوران مریضوں کا اوسطاً قیام 3.2 دن رہا۔
کورونا وائرس سے صحت کے شعبے سے وابستہ ورکروں میں 174 اموات رپورٹ ہوئیں، جن میں سے 103 ڈاکٹر، ایک میڈیکل کا طالب علم، چار نرسیں اور 66 پیرا میڈیکس کورونا وائرس کا شکار ہوکر زندگی کی بازی ہار گئے۔
