واشنگٹن: (آئی این این) امریکا نے بھارت میں مسلمانوں کی نسل کشی کے کھلے عام مطالبات پر تشویش کا اظہار کر دیا۔
واشنگٹن میں منعقد ہونے والی تین روزہ انٹرنیشنل ریلیجئیس فریڈم سمٹ کے دوران امریکی سفیر برائے بین الاقوامی مذہبی آزادی کا کہنا تھا کہ بھارت میں مسلمانوں کے گھروں کو مسمارکیا جارہا ہے۔ غیر انسانی بیان بازی اقلیتوں پر ظلم و ستم کو بڑھا رہی ہے۔ امریکی سفیر رشاد حسین نے شہریت ترمیمی ایکٹ (سی اے اے) کو بھی تنقید کا نشانہ بنایا۔
واضح رہے کہ بھارت میں سرکاری سرپرستی میں مسلمانوں کی منظم نسل کشی کے منصوبوں کا ماضی میں بھی انکشاف ہوا ہے، عالمی تنظیم “دی ورلڈ ود آوٹ جینو سائیڈ” نے اپنی ایک گذشتہ رپورٹ میں کہا تھا کہ بھارتی مودی حکومت ہالوکاسٹ کی طرز پر مسلمانوں کی نسل کشی کی تیاری کر رہی ہے۔