لاہور:(آئی این این) ہائر ایجوکیشن کمیشن کے زیر اہتمام ہونے والی سپورٹس چیمپئنز ٹرافی یونیورسٹی آف سنٹرل پنجاب (یو سی پی) نے جیت لی۔
یونیورسٹی آف سنٹرل پنجاب کے آڈیٹوریم میں ’’ٹرافی کمز ہوم‘‘ کا جشن بھرپور انداز میں منایا گیا، چیئرمین یوسی پی میاں عامر محمود نے بطور مہمان خصوصی شرکت کی، ایگزیکٹو ڈائریکٹر پنجاب گروپ سہیل افضل، پرو ریکٹر یو سی پی ڈاکٹر نصراکرام، ڈائریکٹر سپورٹس ارشد ستار، فیکلٹی ڈینز، ڈائریکٹرز، اساتذہ اور طلباء و طالبات کی بڑی تعداد نے تقریب میں شرکت کی۔
مہمان خصوصی میاں عامر محمود نے شاندار کارکردگی کا مظاہرہ کرنے والے کھلاڑیوں میں ڈیڑ ھ کروڑ روپے کے نقد انعامات تقسیم کئے، قرعہ اندازی کے ذریعے 3 کوچز کو عمرہ کے ٹکٹ بھی دئیے گئے،4 بہترین کھلاڑیوں کو خصوصی انعامات سے نوازا گیا۔
میاں عامر محمود نے کھلاڑیوں اور کوچز کو بہترین کارکردگی پر شاندار الفاظ میں خراج تحسین پیش کیا اور کہا کہ یوسی پی کھیل اور کھلاڑیوں کی فلاح و بہبود کیلئے ہر ممکن مدد اور وسائل فراہم کرتی رہے گی۔
کھلاڑیوں نے پروریکٹر یو سی پی ڈاکٹر نصر اکرام کو ٹرافی پیش کی۔
ڈاکٹر نصر اکرام نے کہا کہ جیت کے جذبے سے سرشار باصلاحیت کھلاڑی مستقبل میں بھی پاکستان کا نام عالمی سطح پر روشن کریں گے۔
ہائر ایجوکیشن کمیشن کے زیراہتمام ہونے والے مقابلوں میں 200 سے زائد یونیورسٹیوں اور تعلیمی اداروں نے شرکت کی، یوسی پی نے مجموعی طور پر 30 مقابلوں میں سے 20 میں گولڈ میڈلز، 5 مقابلوں میں سلور میڈلز اور 2 ایونٹس میں برانز میڈلز جیت کر سپورٹس ٹرافی مسلسل گیارہویں بار اپنے نام کی۔
یوسی پی کے کھلاڑیوں نے مرد و خواتین کیٹیگریز کے مقابلوں میں فٹ بال، بیس بال، ہاکی، سوئمنگ، ٹیبل ٹینس، ریسلنگ، ویٹ لفٹنگ، ٹینس، جوڈو کراٹے اور باسکٹ بال سمیت دیگر اہم مقابلوں میں گولڈ میڈلز جیتے۔