رواں ماہ کے آغاز میں سابق وزیر اعظم عمران خان کو تحریک عدم اعتماد کے ذریعے عہدے سے ہٹانے کے خلاف پاکستان تحریک انصاف (پی ٹی آئی) کے سپورٹرز لندن میں ایون فیلڈ فلیٹس پر نواز شریف کے گھر کے باہر گزشتہ تین ہفتوں سے ہر اتوار احتجاج کر رہے ہیں۔
نجی اخبار کی رپورٹ کے مطابق سوشل میڈیا پر شیئر کی جانے والی ویڈیوز میں خواتین اور بچوں سمیت سینکڑوں مظاہرین کو جائے وقوعہ پر جمع ہوتے ہوئے دکھایا گیا ہے۔
مظاہرین کی جانب سے ’چور ہے، چور ہے‘، ’ہم لے کے رہے گی آزادی‘، ’امریکا کا جو یار ہے، غدار ہے‘ جیسے نعرے لگائے گئے۔
علاوہ ازیں ہائیڈ پارک میں احتجاجی مظاہرہ کرنے والے شخص کوپی ٹی آئی کے مخالفین اور مسلم لیگ (ن) کے اراکین بشمول جہانگیر ترین، علیم خان، رانا ثناء اللہ، طارق بشیر چیمہ کی تصاویر پر سینڈل مارتے ہوئے دیکھا گیا۔
خیال رہے قبل ازیں 10 اپریل کو لندن میں مقیم پاکستان مسلم لیگ (ن) اور پاکستان تحریک انصاف کے کارکنان سابق وزیر اعظم اور پی ایم ایل (ن) کے سربراہ نواز شریف کی رہائش گاہ کے باہر ایک دوسرے کے آمنے سامنے آگئے تھے۔
ایک گروپ کی جانب سے چیئرمین پی ٹی آئی عمران خان کو وزیر اعظم کے عہدے سے ہٹانے کا جشن منایا گیا جبکہ دوسرا گروپ احتجاج کرتا نظر آرہا تھا۔
دونوں گروپوں نے ایک دوسرے کے لیڈران کے خلاف نعرے بازی کی، اس موقع پر پولیس کی بھاری نفری جائے وقوع پر موجود تھی۔
عمران خان کے لندن کے ترجمان صاحبزادہ جہانگیر نے ایک ویڈیو کے ذریعے پارٹی کارکنان کو ’پاکستان میں امریکا کی مبینہ غیر ملکی مداخلت‘ کے خلاف احتجاج کے لیے پارک میں جمع ہونے اور اس کے بعد امریکی سفارت خانے کے باہر احتجاج کرنے کا پیغام دیا تھا۔
پی ٹی آئی کے واٹس ایپ گروپوں میں گردش کرنے والے پیغام میں کہا گیا کہ احتجاج کا مقصد ’حکومت کی تبدیلی‘ اور سپریم کورٹ کے فیصلے کے خلاف آواز بلند کرتے ہوئے الیکٹرانک ووٹنگ مشینوں کے ذریعے منصفانہ انتخابات کروانے کے ساتھ بیرون ملک مقیم پاکستانیوں کو ووٹ کا حق دلوانا ہے۔
پی ٹی آئی کے احتجاج کے دوران اسپیکر اور احتجاج کے شرکا دونوں نے عمران خان کو ہٹانے میں امریکی کردار کی مذمت کی، متعدد شرکا کا کہنا تھا کہ ان کا ماننا تھا کہ عمران خان نے جو ’دھمکی آمیز مراسلے‘ اور سازش کی بات کی ہے وہ حقیقت ہے۔
عمران خان کے کچھ حمایتیوں نے ملٹری اسٹیبلشمنٹ پر تنقید کرتے ہوئے وزیر اعظم کی برطرفی کا ذمہ دار انہیں ٹھہرایا تھا۔